ភ្នំពេញៈ ការគំរាមកំហែងពីឯកអគ្គរាជទូតកម្ពុជាប្រចាំនៅប្រទេសកូរ៉េខាងត្បូងដែលបានព្រមានពលករកម្ពុជាដែលកំពុងធ្វើការក្នុងប្រទេសនេះឲ្យចៀសចេញពីការធ្វើការតវ៉ាប្រឆាំងរដ្ឋាភិបាលបើមិនដូច្នោះអាចប្រឈមមុខនឹងការចាប់ខ្លួន ឬនិរទេសពីអាជ្ញាធរកូរ៉េអាចមិនពិតទេ។
ចាប់តាំងពីកាន់តំណែងជាឯកអគ្គរាជទូតកម្ពុជាប្រចាំប្រទេសកូរ៉េខាងត្បូងកាលពីខែមេសាឆ្នាំ ២០១៤ មកលោក ស៊ុត ឌីណា បានធ្វើការគំរាមកំហែងជាសាធារណជាប់ជានិច្ចតាមរយៈហ្វេសប៊ុករបស់លោកសំដៅទៅពលរដ្ឋកម្ពុជារាប់ពាន់នាក់ដែលកំពុងធ្វើការក្នុងប្រទេសកូរ៉េដែលមាននិន្នាការគាំទ្រគណបក្សសង្គ្រោះជាតិ។
កាលពីថ្ងៃព្រហស្បតិ៍ សប្តាហ៍មុន លោកបានបង្ហោះរូបថតរបស់លោកដែលកំពុងអង្គុយនៅក្នុងការិយាល័យមួយជាមួយនឹងបុរសម្នាក់ដែលមិនបង្ហាញឈ្មោះដោយលោកនិយាយថាជាផ្នែកនៃអង្គភាព «ចារកម្មពិសេស» របស់កូរ៉េដែលកំពុងធ្វើការងារជាមួយស្ថានទូតដើម្បីបំបែកបណ្តាញពលករខុសច្បាប់ដែលលោកនិយាយថាកំពុងញុះញង់ឲ្យមានការតវ៉ាប្រឆាំងរដ្ឋាភិបាល។
គ្រាន់តែប៉ុន្មានថ្ងៃក្រោយមក លោក ឌីណា បានបង្ហោះវីដេអូរូបលោក និងបុរសបីនាក់ដែលកំពុងសុំសេចក្តីករុណាពីលោកនាយករដ្ឋមន្រ្តី ហ៊ុន សែន ចំពោះការដែលពួកគេតវ៉ា និងដុតរូបសំណាកលោកនាយករដ្ឋមន្រ្តី និងបានដាក់វានៅលើហ្វេសប៊ុកកាលពីរឆ្នាំមុន។ ការដុតនេះបានធ្វើឡើងនៅចំពេលដែលមានបាតុកម្មប្រឆាំងគណបក្សប្រជាជននៅក្នុងប្រទេសកូរ៉េដែលបង្កឡើងមកពីការបង្ក្រាបដ៏ព្រៃផ្សៃមកលើមហាបាតុកម្មទាមទារប្រាក់ឈ្នួលអប្បបរមារបស់កម្មករខ្មែរនៅរាជធានីភ្នំពេញ។
បុរសទាំងនោះបាននិយាយថា ពួកគេបានប្រគល់ខ្លួនដោយខ្លួនឯងមកស្ថានទូតនៅសេអ៊ូលដោយសារភ័យខ្លាចការចាប់ខ្លួនពីកម្លាំងសន្តិសុខរបស់កូរ៉េបន្ទាប់ពីឯកអគ្គរាជទូតរូបនេះបានបង្ហោះលើហ្វេសប៊ុកថា លោកកំពុងធ្វើការងារជាមួយអង្គភាព «ចារកម្មពិសេស» របស់កូរ៉េ។
លោក ឌីណា បានបដិសេធឆ្លើយតបនឹងសំណើសុំអត្ថាធិប្បាយជាច្រើនដងនាសប្តាហ៍នេះប៉ុន្តែក្រសួងការបរទេសកូរ៉េបានថ្លែងថាពួកគេមិនបានដឹងអំពីសំណើសុំស៊ើបអង្កេតពលករខុសច្បាប់នោះទេ។
ក្រសួងការបរទេសកូរ៉េបានថ្លែងនៅក្នុងសេចក្តីថ្លែងការណ៍មួយថា៖ «ក្រសួងការបរទេសមិនបានទទួលសំណើណាមួយពីស្ថានទូតកម្ពុជាប្រចាំទីក្រុងសេអ៊ូលពាក់ព័ន្ធនឹងបញ្ហាពលករចំណាកស្រុកទេ»។
លោក ជុំ សុន្ទរី អ្នកនាំពាក្យក្រសួងការបរទេសកម្ពុជាបានថ្លែងកាលពីម្សិលមិញថាលោកបានដឹងអំពីការបង្ហោះនៅលើហ្វេសប៊ុកនោះ ប៉ុន្តែ លោកមិនមានព័ត៌មានដែលលោកត្រូវធ្វើអត្ថាធិប្បាយទេ៕
ប្រភពពីៈ ភ្នំពេញប៉ុស្តិ៍
កែសំរួលដោយ ៈ ពត៍មានចំរុះ
No comments:
Post a Comment