យុវជនកូនខ្មែរម្នាក់បានសម្រេចចិត្ដលះបង់ការងារ ដែលទទួលបានចំណូលជាមធ្យមជាង ៨០០ ដុល្លារក្នុង ១ ខែ ត្រលប់មកបើកក្រុមហ៊ុនលក់សំបុត្រឡានអ៊នឡាញខ្លួនឯងវិញ ខណៈស្ថាបនិកវ័យក្មេងរូបនេះ កំពុងមានមហិច្ឆតា ពង្រីកវិសាលភាពក្រុមហ៊ុនមួយនេះ។
លោក ជា ឡង់ដា ស្ថាបនិកក្រុមហ៊ុន លក់សំបុត្រឡានអ៊នឡាញ BOOKMEBUS.COM បានប្រាប់ LIFT ថា៖ «ការបើកក្រុមហ៊ុននេះ អាចថា មកពីដុង ឬមកពីខ្ញុំធ្វើការងារឲ្យគេលើគម្រោងនិមួយៗទទួលបានលុយរាប់ម៉ឺនដុល្លារ ក៏កើតគំនិតថា ចុះម៉េចមិនរកលុយខ្លួនឯង យកប្រាក់ខែគេប៉ុណ្ណឹងធ្វើអី មានគំនិតអញ្ចឹង បានធ្វើឲ្យខ្ញុំចេះតែនៅមិនសុខ ខ្ញុំចេះតែមើលឃើញឱកាស ក៏សម្រេចចិត្ដឈប់ធ្វើការងារ បែរមកចាប់យកអាជីវកម្មខ្លួនឯងតែម្ដង» ។
ការសម្រេចចិត្ដបោះបង់ការងារដែលខិតខំកសាងជាង ១ ឆ្នាំ ក្នុងតំណែងជា IT Project Manager នៃក្រុមហ៊ុនជប៉ុនដ៏ធំមួយនៅក្នុងស្រុក ដែលអាចទទួលបានប្រាក់ខែជាង ៨០០ ដុល្លារក្នុង ១ ខែនោះ លោក ឡង់ដាបន្ដថា «បើខ្ញុំមិនលះបង់ទេ មិនចាប់ផ្ដើមទេ ខ្ញុំនឹងមានវិប្បដិសារីអស់មួយជីវិត»។
យុវជនមានឈាមកំណើតជាកូនអ្នកខេត្ត បាត់ដំបង រូបនេះយល់ឃើញថា យុវជនជាច្រើនវ័យស្រករៗខ្លួន មានជំនាញច្រើនណាស់ ប៉ុន្ដែមិនហ៊ានប្រថុយ ព្រោះពួកគេចូលចិត្ដបរិយាកាសការងារ ជាជាងការប្រកួតប្រជែង។
លោកបន្ថែមថា «ពួកគាត់អាចគិតថា បើទៅមិនដឹងយ៉ាងម៉េចៗទេ ប្រាក់ខែប៉ុណ្ណឹងរកមកម៉េចបាន។ ប៉ុន្ដែសម្រាប់ខ្ញុំវិញ ខ្ញុំគិតថា មានជំនាញបើសិនបរាជ័យ ខ្ញុំអាចទៅធ្វើកន្លែងថ្មីមួយទៀត និងអាចទទួលបានប្រាក់ខែលើសហ្នឹងថែមទៀត»។
ស្ថាបនិកវ័យក្មេងរូបនេះ បានប្រាប់ឲ្យដឹងដែរថា ការសម្រេចចិត្ដវិនិយោគនៅលើអាជីវកម្មមួយនេះ ត្រូវចំណាយទុនដំបូង ២ ម៉ឺនដុល្លារ និងចាប់ផ្ដើមបើកដំណើរការក្រុមហ៊ុននេះ កាលពីចុងឆ្នាំ ២០១៥។
លោក ជា ឡង់ដា បញ្ជាក់ថា BOOKMEBUS.COM គឺជាគេហទំព័រដំបូងដែលបង្កើតឡើងក្នុងគោលបំណងបង្កលក្ខណៈងាយស្រួល ដល់ប្រជាជនខ្មែរ ភ្ញៀវទេសចរណ៌ជាតិ និងអន្ដរជាតិក្នុងការទិញសំបុត្រធ្វើដំណើរ និងបង់ប្រាក់តាមរយៈប្រព័ន្ធអ៊ីនធឺណែត និងធ្វើឲ្យទៅជាជម្រើសទីមួយសម្រាប់អ្នកធ្វើដំណើរនឹងម្ចាស់ក្រុមហ៊ុន លើមធ្យោបាយធ្វើដំណើរទាំងក្នុងប្រទេសនិងក្រៅប្រទេស។
សូមបញ្ជាក់ថា ក្រុមហ៊ុនមួយនេះកំពុងទទួលបានការសហការយ៉ាងច្រើនពីក្រុមហ៊ុនឡានដឹកអ្នកដំណើរ ដោយមានដៃគូរសហការជាង ៣០ ក្រុម និងអាចលក់សំបុត្របានយ៉ាងយោចណាស់ ៣០០ សំបុត្រក្នុង ១ ខែ៕
No comments:
Post a Comment